Neysluvatnið á Akranesi – nokkrar staðreyndir.

Heilbrigðiseftirlit Vesturlands er eftirlitsaðili með neysluvatni á Akranesi.

Eftirlitið felst í að taka sýni úr dreifikerfi Veitna en einnig eru tekin sýni hjá viðkvæmum notendum. Húseigendur bera svo sjálfir ábyrgð á að lagnir innan húss séu í lagi.

Tíðni sýnatöku eftirlitsins er að lágmarki 7 sinnum á ári en einnig er gerð efnagreining á vatninu tvisvar á ári og þá skannað fyrir fjöldanum öllum af efnum. Niðurstaðan er að vatnið á Akranesi stenst gæði reglugerðar um neysluvatn. 

 Þar sem uppruni drykkjarvatnsins er að hluta yfirborðsvatn fylgir því meira grugg en ella sem er þó ekki á nokkurn hátt skaðlegt. Gruggið er ekki endilega sýnilegt en gæti sést ef sett er fín sía á inntak. Slíkur búnaður er þó alveg óþarfur fyrir almennan notanda. Þegar sía er sett á vatnsinntakið þarf að gæta að dagsbirta komist ekki að síunni og eins að hún sé ekki nálægt hitagrind eða annarsstaðar þar sem gæti hitnað í síunni. Þá er líklegt að hún verði gróðrarstía fyrir bakteríur og þá farin að gera meira ógagn en gagn. Skipta þarf um síur reglulega þar sem þær eru til staðar. Það að sía safni efni þýðir ekki að vatnið sé á nokkurn hátt af lélegum gæðum eins og fyrr segir. Veitur hafa óskað eftir að tekið verði aukalega sýni í tengslum við þessar áhyggjur og verður það gert í dag (miðvikudag 13. maí 2026).  Niðurstöður ættu að liggja fyrir í byrjun næstu viku. Það er sem sagt algerlega óhætta að drekka vatnið á Akranesi.

Sjá nánar samantekt Þorsteins Narfasonar framkvæmdastjóra Heilbrigðiseftirlits Vesturlands hér : Neysluvatn á Akranesi